ضرووري في كل عيلة

[center]صحيح الناس مختلفة عن بعض و صحيح لما يجي واحد يفهمك هالشغلة بيقولك اصابيعك مش زي بعضها بس ولا يمكن الا تلاقي تشابه في نمطية الشخصيات



في كل عيلة بتلاقي اشخاص بيتكرروا
***
الشخص الخفيف الدم اللي بيسلي القعدة

و عادة بيكون لسانه زفر شوي و مسموحله يحكي شو ما بده
طول ما هو عم بيضحك بالبشر
و هو اللي ابن عمه لما يخطب بيحكي لخطيبته عنه: لو تشوفي ابن عمي نكتجي نهفة بموتك ضحك
و بيجي النكتجي عالقعدة نافخ ريشه لانه عارف شو بينحكى وراه
و شو ما حكي النكتجي الكل بيضحك
حتى لو حكى صباح الخير
***
كاتب العيلة او شاعر القعدة

بيكون عادة زلمة شوي كبير بالعمر من اللي بيعرفوا شو يعني كتب و قراءة
الزغار بيشوفوه ممل لانهم مش فاهمين شو بيحكي
و الكبار بيقعدوا حواليه متظاهرين انهم مهتمين و مبسوطين
بس بيكونوا يتمنوا لو نكتجي يجي

***
نمامة العيلة

و هاي عادة بتكون زوجة احد الاعمام او اولاد العمام
ما بعرف ليش وما تسالوني!
هاي اللي عندها الاخبار دايما
و اخبارها لازم تشيل نصها و تصدق نص اللي شلته
عشان توصل للحقيقة بتبهر و بتفلفل على خاطرها
و بتضيف من عندها بيحبوها النسوان و بيكرهوها و بنفس الوقت بخافوا منها
بتحس هيه بأهميتها لما حدا يسألها شو الاخبار
و بتفرد حالها و بتبلش تذيع و بالاخر بتقولك بالله ما تجيبي سيرة اني قلت لك انا شو خصني
بتعرفيني بمشي الحيط الحيط و بقول يا رب السترة

***
غنية العيلة
كل عيلة فيها واحد بيكون اغنى من الكل
و بكل عيلة بتكون مرته مركز نظر النساوين شو لبست ووين راحت و شو عملت
و بتكون نمامة العيلة زي الذنب الها عشان تجيبلهم الخبر اليقين
بتحكي من طرف مناخيرها
و بتقعد عطرف الكرسي كانها قرفانة
و اذا بتضيفها اشي يا بترفضه او بتاخده بس ما بتاكله ع اساس انها شبعانة ببيتها
كلامها و احاديثها لا تتعدى شو عملت الفلبينية
و كيف تخانقت مع السيرلانكية
و اديش الشوفير منشف دمها
يعني كمان شوي بتحزن عليها

****
مصرف العيلة
بيقولك كل عيلة زي الحمام اله مصرف
(مش بنك قصدي بلاعة)

و مصرف العيلة هو الشخص اللي بيجيب العار للعيلة بعمايله السودا
بيستعروا منه بس برضه بخافوا منه لانه بايعها و مش فارقة معه
بيكون عادة صحبة مع نكتجي اللي بيشوف فيه مصدر هام للتنكيت
***
كبير العيلة

و هذا اللي بدك تسد بوزك و تسمعه و هوة بيعيد القصة مرة ورا مرة
بحكيلك قصص ايام الحصيدة و الثلجة الكبيرة
و لما كان بالجيش
نص قصصة كذب بكذب
مش بقولو ما اكذب من شاب تغرب الا ختيار ماتت اجياله؟
كان رح يشتري نص عبدون
والشميساني إنعرض علية بالف ليرة
لما كان كيلو اللحمة بعشرين قرش
***

متغرب العيلة
كل عيلة فيها على الاقل واحد بالخليج
بيجي بالصيف و الكل بيكون يستنى الهدايا
لما يوصل بيلاقي الكل متجمع و الكل بيسلم عليه
و بتكون امه عامليتله ورق و كوسى
و شباب العيلة بينجمعوا و اشتقنالك يا ابو الزوز
و شوفلنا شغل معاك و الله اخوك مش لاقي يحلق
كأنه المسكين صاحب شركة هناك
طبعا العرط بيشتغل من طرفه
و بحكيلك عن سيارته البورش و بيته و بيكون عايش مع ثلاثة بنفس الغرفة
بعد يومين بتلاقيه قاعد عالبلكونة بالفانلة
لحاله بيشرب شاي
ولا حدا سائل فيه
و امه بالمطبخ بتعمل مجدرة
****
عزابي العيلة

او الدون جوان النسوانجي
بيكون حليوة (نسبيا طبعا)

و بس يزور حدا من القرايب عندهم بنات بينضبوا
و بيصيروا يطلعوا عليه من بعيد و بتشتغل المسجات
هذا بيكون عنده شوية غرور على شوية عجرفة
بقعد و بيحط اجر على اجر و عادة بيصير عمره فوق الاربعين و ما بتجوز
و بضل يشتري سيارات بي ام على امل انها تصيد
بكل قعدة بحكي عن غرامياته و بيتجمعوا حواليه شباب العيلة
و بيصير يورجيهم صور و مسجات
برضة بيكون صحبة مع نكتجي و مصرف العيلة و بيسهروا سوا

****

شقفة العيلة
احلى بنت بالعيلة
بتكون محط انظار اولاد العم و الخال بس هيه نظرها بعيد شوي
بتمشي يا ارض اشتدي ما عليكي قدي
و بتقعد مع نساوين العيلة عشان يصيروا يمدحوا جمالها
برضه متل دون جوان العيلة ما بعجبها العجب و بتطول لتتجوز
اذا تجوزت اصلا
ما بتكون صحبة مع بنات العيلة و بتلاقيها دايما في الاعراس بتتلقط عريس من بعيد
من مبدأ نفسي فيه و تفو عليه




***



دكتور العيلة

و هذا المسكين اللي ما بتهنى بقعدة
بس يوصل لمحل بنلموا عليه و يا ميمتى خواصري بيجعنني
و اللي بتنادي ابنها تعال ورجي الدكتور حلقك
هاتي معلقة يا غدير خلية يشوف زلاعيم اخوكي
و اللي بيعرض عليه روشتات دكاترة تانية
و اللي بيجيبله صور اشعة
و االلي بقولوا شوفلي ضغطي
طبعا كل القاعدين بفحصوا ضغطهم بعده
و كل حياته بتكون هيك بغض النظر ان كانت زيارة او عرس او حفلة
طبعا هو ما بيقصر
و ممكن يصير يقولك مين الحمار الي اعطاك هذا الدوا ارميه و بكتبلك غيره

***
كمبيوترجي العيلة

هذا طبعا بعد طفرة الكمبيوتر صار له اهمية كبيرة
وضعه متل دكتور العيلة
و بتقول امه بكل خيلاء
بس يجي الكمبيوترجي بيزبطلك الكومبيوتر
و الله ما في اشطر منه
مبارح خلانا نشوف عمرو دياب
و بيجي الكمبيوترجي المسكين
شوف كمبيوتر ابن خالتك اللعبة ما بتشتغل
و بيجي ابنها و بيقعد يتفرج على الكمبيوترجي
مثله الاعلى بالحياة و هو بيشغّل الكومبيوتر
و ينبهر
و بيفهمه الكمبيوترجي انه عشان تقدر تلعب اللعبة لازم بالاول تشغّل الكومبيوتر
***

طفل العيلة الموهوب

هذا اللي بكل لمة بنادوه يغني
تعال عبود غني لعمو اغنية اليسا لو تشوفو كيف بغنيها
و طبعا في نوعين من عبود:
في عبود اللي بستحيش " الزنخ "
و بتلاقيه قرفك و هو بيعيد بالاغنية
و امه فرحانه فية و كل شوي بتقول ما شاء الله
كأنه ما حدا خلّف غيرها


او النوع اللي بتطلع روحك و امه بتقنعه يغني
و ياللا ورجي العمو اديش انت شاطر
و بتصير انت بدك تخلص
بتقوله غني حبيبي بعطيك شوكولاتة
و بيكون بجيبتك شوكولاتة مفعصة من عرس قديم
بتورجيه اياها كنوع من الاغراء

و في حالة كان دكتور العيله قاعد بيجي التهديد المباشر
اذا ما بتغني الدكتور بضربك ابرة
بتلاقيه صار يغني و نص اصابيعه بتمه
و بتصير امه تعطي اعذار و بتعصب عليه
عاد بالبيت طول نهارك تغني روح تخيب من وجهي
في كل عيلة بتلاقيهم و الله يستر لما بينجمعوا
[b]